Душанбе. 17-уми ноябр. ОИ «Азия-Плюс» – Сардори шӯъбаи рушд ва маҳдуд кардани фаъолияти монополии Раёсати сиёсати зиддинҳисорӣ ва рушди соҳибкории Вазорати рушди иқтисод ва савдои Тоҷикистон Акбар Хоҷаев изҳор дошт, ки дар Тоҷикистон арзиши орду гандум поин хоҳад рафт.
Номбурда то чӣ андоза поин рафтани арзишро дақиқан номбар накард ва танҳо зикр сохт, ки «дар ҷаҳон тамоили пастравии арзиши ин мавод ба назар мерасад ва хоҳ нохоҳ он ба Тоҷикистон низ асар хоҳад гузошт».
Ба қавли ӯ, ба коҳиш ёфтани арзиши орду гандум паст рафтани нархи сӯзишворӣ ва нишондиҳандаи ғаллаи соли равон ҷамъоварда дар ҷаҳон низ таъсир мерасонад. «Тибқи таҳқиқоти маркетингӣ, ҳаҷми зироати ғалладонаи соли ҷорӣ ҷамъоварда дар ҷаҳон 2 млрд. 200 млн. тоннаро ташкил медиҳад, ки дар муқоиса бо нишондиҳандаи соли гузашта 3,8 дарсад зиёдтар аст.
Дар ҳамин ҳол, тибқи маълумоти Вазорати кишоварзии ҷумҳурӣ, то имрӯз беш аз 400 ҳазор тонна гандум ҷамъоварӣ шудааст ва ин дар ҳолест, ки ин рақам соли гузашта ба 298 ҳазор тонна баробар буд. Зикр гардид, ки ин миқдор ҳосил то 70 дарсади талаботи ҷумҳуриро қонеъ месозад.
Тибқи маълумоти Вазорати рушди иқтисод ва савдои ҷумҳурӣ, ба Тоҷикистон асосан аз Қазоқистон
ва Русия орду гандум ворид мегардад. Феълан арзиши як халта орди навъи якуми 50-килоӣ дар бозорҳои пойтахт ба 105 сомонӣ ($29,42) баробар аст.
