Душанбе. 14-уми ноябр. ОИ «Азия-Плюс» – Бензини навъи АИ-94 ва АИ-96, ки
дар Тоҷикистон ба фурӯш бароварда шудаанд, ба меъёр ҷавобгӯ нестанд.
Тавре сардори шӯъбаи рушди рақобат ва зиддиинҳисории Вазорати рушди иқтисод ва савдои ҷумҳурӣ Акбар Хоҷаев ба ОИ «Азия-Плюс» хабар дод, чунин навъи бензин ба ҷумҳурӣ ворид нагардидааст ва фурӯшандагони он харидоронро ба гумроҳӣ андохтаанд.
Ба иттилои манбаъ, чунин навъи бензинҳои қалбакӣ дар нуқтаҳои фурӯши сӯзишвории маҳаллаҳои Яккачинор-119, Борбад-1 ва ҶДММ «Нақлиётгаз» фурӯхта мешуданд.
А.Хоҷаев мегӯяд, чунин ҳодисаҳо зимни санҷиши гузаронидаи гурӯҳи корӣ иборат аз намояндагони Вазорати рушди иқтисод ва савдо, «Агентии «Тоҷикстандарт» ва Бонки Миллӣ ошкор карда шуданд.
Зикр гардид, ки ба ҷуз сифати маҳсулот, инчунин арзиш ва ҷараёни тағйирёбии он низ санҷида шудааст. «То ахири моҳи ноябр арзиши он ба 2 сомониву 60 дирам баробар шуда, ахири сол коҳиши нархи он дар муқоиса бо арзиши имрӯза ба андозаи 20 дарсад камтар хоҳад шуд», – афзуд сарчашма.
