Чанде қабл дар қароргоҳи ҲНИТ вохӯрии роҳбари ҳизб Муҳиддин Кабирӣ ва масъулини ҳизб бо хонум Антҷе Линдертсе, раиси қисми Аврупои Шарқӣ, Қафқоз ва Осиёи Марказии Вазорати корҳои хориҷии Олмон ва сафири Олмон дар Тоҷикистон хонум Ҳейнер Ҳорстейн баргузор гашт.
Тавре аз қароргоҳи ҲНИТ хабар доданд, зимни мулоқот тарафҳо масоили марбут ба вазъияти кунунии минтақа, кишвар ва Бадахшонро баррасӣ намуданд.
Муҳиддин Кабирӣ, раҳбари ҲНИТ аз ҳукумати Олмон барои ҳамкорӣ ва кумакҳояш ба Тоҷикистон ва инчунин барои муносибати мутавозинаш бо ҳукумат ва аҳзоб изҳори миннатдорӣ кард.
Дар робита ба вазъи кунунии ВМКБ, Муҳиддин Кабирӣ мавҳеъи ҳизбро баён намуда, онро душвор, вале ҳалшаванда номид. Вай гуфт: «Роҳи ҳал ҳам танҳо дар муколама ва ҳамдигарфаҳмии ҳукумат бо мардум мебошад. Ҳизби мо аз аввал ҷонибдори роҳи ҳалли мусолиматомези ин қазия мебошад ва ба назари мо, ҳалли он танҳо аз тариқи гуфтушунид буд ва ҳаст. Мо қатъиян зидди хушунат ва истифодаи артиш ва умуман силоҳ дар чунин ҳолат ҳастем».
Инчунин роҳбари ҲНИТ нақши созмонҳои байналмилаллиро дар ҳалли қазия муҳим шуморида, гуфт: «Мо аз ҳама созмонҳои байналмиллалӣ ва корпусҳои дипломатие, ки дар ҳалли осоиштаи ин қазия дар даври аввали он саҳм гузоштанд, изҳори сипос мекунем. Бовар дорем, ки ҷомеъаи ҷаҳонӣ низ хоҳони ҳалли ингуна қазияҳо бо роҳи осоишта мебошанд. Барои мавқеъи дуруст доштани ҷомеъаи ҷаҳонӣ нисбати ингуна масоил бояд шинохти воқеъӣ вуҷуд дошта бошад. Мутаассифона, баъзан дар Ғарб аз вазъияти воқеии Осиёи Марказӣ, аз ҷумла кишвари мо пурра огоҳ нестанд, ки ин боиси баҳогузориҳои нодуруст мегардад».
