Рӯзҳои ахир бар асари камбуди шадиди гази моеъ аксари нуқтаҳои фурӯши маводи сӯзишвории минтақаи шимоли ҷумҳурӣ аз фаъолият бозмондаанд.
Бино ба маълумоти мудири шуъбаи нақлиёт ва коммуникатсияи ҳукумати вилояти Суғд Қобилҷон Усмонов, чанде қабл ширкати «Хуҷанднафтугаз» аз Қазоқистон 27 вагон гази моеъ ворид намуда, ин мушкилот ҳал мешавад.
Ӯ хотиррасон намуд, ки айни замон 65-70%-и нақлиёти ҷамъиятӣ ба истифодаи гази моеъ гузаштаанд. Феълан дар нуқтаҳои фурӯши маводи сӯзишвории вилояти Суғд арзиши 1 литр гази моеъ ба 3,60-3,70 сомонӣ баробар аст ва ин ҳам дар ҳолест, ки ҳафтаи гузашта қимати он 3 сомонӣ ва якуним моҳ пештар 1 сомониву 80 дирамро ташкил медод.
Дар робита ба якбора ба андозаи хеле зиёд болоравии қимати гази моеъ номбурда гуфт, ин ба нархи муайянардаи кишварҳои содиркунандаи ин навъи маводи сӯзишворӣ вобаста аст.
Бино ба маълумоти Раёсати минтақавии хадамоти гумруки вилояти Суғд, дар зарфи 8 моҳи соли равон ба минтақаи шимоли ҷумҳурӣ 49 ҳазору 825 тонна гази моеъ ворид гардидааст. Дар ҳамин давраи соли гузашта ин нишондиҳанда 17 ҳазору 700 тоннаро ташкил медод.
