Гурӯҳи ҳунарии Театри драмавии русии ба номи Маяковский дар ҷашнвораи якуми байнулмилалии театрии «Ҷаҳони Исобеков» (Мир Исабекова) иштирок мекунад. Ин ҷашнвора аз 10 то 17-уми октябр дар шаҳри Алмаатои Қазоқистон доир мегардад.
Тавре ба ОИ «Азия-Плюс» роҳбари Дастгоҳи Вазорати фарҳанги ҷумҳурӣ Абдуғаффор Абдуҷабборов хабар дод, гурӯҳи ҳунармандони театри Маяквский бо спектакли «Транзитный пассажир» дар таҳияи Ҳунарешаи шоиста Тоҷикистон Мунира Додобоева ба ҷашнвора мераванд.
Ба гуфтаи вай, соли гузашта муаллифи пйеса мазкур Дулат Исобеков дар нахустнамоиши спектакли «Транзитный пассажир» дар шаҳри Душанбе иштирок намуда, ба заҳмати коргардон баҳои шоиста дод.
Қобили зикр аст, ки ҷашнвораи мазкур ба ҷашни 70-умин солгарди драматурги маъруфи қазоқ ва Дорандаи Ҷоизаи давлатии Қазоқистон Дулат Исобеков бахшида шудааст.
Фаъолияти Театри драмавии русии ба номи Маяковский моҳи ноябри соли 1937 оғоз гардида, соли 1940 ба он номи В.Маяковский гузошта шуд. Дар муддати тамоми фаъолият дар ин театр ба сурати умум беш аз 400 спектаклҳо дар мавзӯъ ва жанрҳои гуногун рӯйи саҳна омадаанд.
