Ҳайати Тоҷикистон дар кори Ҳамоиши ҳафтуми зиёиёни эҷодкор ва илмии кишварҳои узви Иттиҳоди Давлатҳои Мустақил, ки рӯзҳои 14-15-уми октябр дар пойтахти Туркманистон доир мегардад, ширкат хоҳад варзид.
Тавре ба ОИ «Азия-Плюс» аз шуъбаи робитаҳои ҷамъиятии Дастгоҳи иҷроияи президенти ҶТ хабар доданд, ҳайати иборат аз 14 нафараи Тоҷикистонро раиси Кумитаи ҷавонон, варзиш ва сайёҳии назди ҳукумати ҶТ Маликшо Неъматов сарварӣ мекунад.
Ҳамоиши мазкур аз ҷониби Фонди байнидавлатии ҳамкории гуманитарии кишварҳои узви ИДМ созмон дода мешавад. Дар он аз иштироки беш аз 300 нафар арбобони фарҳангу ҳунар ва доираҳои илмии тамоми кишварҳои узви ИДМ, Гурҷистон ва давлатҳои назди Балтик интизорӣ меравад.
Ба гуфтаи директори иҷроияи Фонди байнидавлатии ҳамкории гуманитарии кишварҳои узви ИДМ, Армен Смбатян, дар ҷараёни кори ҳамоиш барои иштирокчиёни он ҷиҳати баррасии масоили нигоҳдорӣ ва рушди имконоти гуманитарӣ, гуногуншаклии фарҳанги миллӣ ва мероси моддиву маънавӣ дар замони муосир шароити мусоид фароҳам оварда хоҳад шуд.
