Душанбе. 13-уми август. ОИ «Азия-Плюс» – Дар ҷаласаи Кумитаи ҳамоҳангсоз оид ба умури дифоъи ҳавоии назди Шӯрои вазирони мудофиаи кишварҳои узви Иттиҳоди Давлатҳои Мустақил (ИДМ) дар Душанбе иштирокдорони он дар шарҳи изҳороти президенти Гурҷистон Михаил Саакшвили бобати хурӯҷи кишвараш аз ҳайъати ИДМ чунин изҳори назар карданд, ки хурӯҷи Гурчистон аз хайъати ИДМ ба низоми дифоъи ҳавоии кишварҳои узви иттиҳод ҳеҷ таъсире нахоҳад гузошт.
Раиси Академияи низомии дифоъи фазоии Русия Олег Балаян гуфт, ки Гурҷистон дар низоми дифоъи ҳавоии кишварҳои узви ИДМ нақши умдае надорад. Дар посух ба суолҳои бешуморе оид ба қазияи Осетияи Ҷанубӣ ва оқибатҳои он намояндагони кумита изҳор доштанд, ки онҳо дар шарҳи ин масъала салоҳиятдор нестанд.
Танҳо намояндаи Русия зикр кард, ки амалиёти низомӣ хотима ёфта, Русия нияти ишғоли қаламрави давлати дигарро надорад.
