Душанбе. 11-уми ноябр. ОИ «Азия-Плюс» – Маъракаи тирамоҳии даъвати ҷавонон ба хизмат дар сафи Қувваҳои Мусаллаҳи ҷумҳурӣ, ки 1-уми октябр оғоз гардид, то имрӯз 80 дарсад иҷро шудааст. Дар ин бора ба ОИ «Азия-Плюс» сухангӯи Вазорати мудофиаи кишвар – Фаридун Муҳаммадалиев хабар дод.
Ба гуфтаи ӯ, дар ноҳияи Зафаробод ва шаҳрҳои Табошар, Қайроққум ва Чкаловск дар вилояти Суғд, шаҳри Норак ва навоҳии Носири Хусрав, Ховалинг ва Балҷувон дар вилояти Хатлон, ноҳияи Мурғоб дар Вилояти Мухтори Кӯҳистони Бадахшон аз ӯҳдаи иҷрои сад дар сади нақшаи даъвати ҷавонон ба хизмати ҳарбӣ баромаданд.
«Нахустин ва ҳанӯз ягона ноҳияе, ки аз миёни навоҳии тобеъи марказ аз анҷоми иҷрои нақшаи даъвати ҷавонон ба хизмат хабар дод, ин нохияи Варзоб мебошад», –
гуфт Муҳаммадалиев.
Инак то имрӯз дар Вилояти Мухтори Кӯҳистони Бадахшон нақшаи даъвати тирамоҳӣ ба андозаи 70 дарсад, Хатлон 84 фоиз, навоҳии тобеъи марказ 75, Суғд 79 ва шаҳри Душанбе 78 фисад иҷро гардидааст.
