Душанбе. 10-уми декабр. ОИ «Азия-Плюс» – Сухангӯи ширкати «Барқи тоҷик» Нозир Ёдгорӣ изҳор дошт, ки корхона кӯшиш ба харҷ хоҳад дод, то аз ҳисоби ҷамъоварии маблағи қарзҳои истифодабарандагони барқ то ахири сол ба пардохти қарзи худ дар назди нерӯгоҳи «Сангтӯда-1» муваффақ гардад.
Қобили зикр аст, ки ҳафтаи сипаригашта мақомоти раҳбарии Ҷамъияти саҳомии кушоди «Нерӯгоҳи Сангтӯда-1» аз ширкати «Барқи тоҷик» дархост кард, маблағи қарз барои нерӯи барқи гирифтаашро, ки 21,4 млн. сомониро (беш аз $6 млн). ташкил медиҳад, пардохт намояд.
Тибқи маълумоти ҶСК Нерӯоҳи Сангтӯда-1», то 31-уми декабри соли ҷорӣ арзиши 1 кВт/соат барқи нерӯгоҳ ба 1,15 сент баробар буда, аз 1-уми январи соли оянда арзиши он то 3,1 сент боло меравад.
Ба гуфтаи Н.Ёдгорӣ, чанде қабл дар машварати корӣ раҳбари ширкат Шарифхон Самиев доир ба вусъат бахшидан ва тезонидани ҷамъоварии маблағҳои қарз аз корхонаву муассисот ва аҳолӣ ба сохторҳои дахлдор супоришоти мушаххас додааст. «Феълан қарзи истифодабарандагони барқ дар назди ширкати «Барқи тоҷик» ба беш аз 260 млн. сомонӣ ( беш аз $76 млн.) баробар аст, ки 90 млн. сомонии он ба корхонаву муассисоти Вазорати мелиоратсия ва захираҳои оби ҷумҳурӣ рост меояд», – гуфт ӯ.
Манбаъ афзуд, ки ширкат ният дорад, барои қарздорон мӯҳлати ахири пардохти қарзро муқаррар созад ва дар сурати дар ин мӯҳлат ҳам напардохтани қарз, интиқоли барқ ба онҳо қатъ хоҳад гардид.
