Душанбе. 10-уми декабр. ОИ «Азия-Плюс» – Имрӯз котибони Шӯрои амнияти кишварҳои узви Созмони аҳдномаи амнияти дастаҷамъӣ (СААД) доир ба ташкили Маркази ҳамоҳангсозии мубориза алайҳи терроризм ва ифротгароӣ қарор қабул карданд.
Тавре хабаргузории ИТАР-ТАСС иттилоъ медиҳад, раисикунандаи ҷаласаи Кумитаи котибони Шӯрои амнияти СААД, котиби Шӯрои амнияти Арманистон Артур Багдасарян ба рӯзноманигорон изҳор доштааст, ки дар ҷаласа перомуни таъсиси Маркази ягонаи ҳамоҳангсозии мубориза алайҳи террорзм, ифротгароӣ, қочоқи маводи мухаддир ва муҳоҷирати ғайриқонунӣ тавофуқ ҳосил шудаааст.
Ба гуфтаи Багдасарян, ташкили чунин марказ инчунин ба «ташаккули имконоти дастаҷамъӣ бобати огоҳкунӣ ва пешгирии оқибатҳои офатҳои фавқулоддаи табиӣ ва техногенӣ низ мусоидат хоҳад кард».
Ёдрас мекунем, ки дирӯз дар Арманистон ҷаласаи Кумитаи котибони Шӯрои амнияти кишварҳои узви СААД ба кор шурӯъ кард. Ба ҳайати СААД давлатҳои Арманистон, Белорус, Қазоқистон, Қирғизистон, Русия, Тоҷикистон ва Ӯзбекистон шомиланд.
