Душанбе. 13-уми декабр. ОИ «Азия-Плюс» – Ҷаласаи дуюми гурӯҳи коршиносон оид ба мувофиқаи лоиҳаи Қарор дар бораи созмонҳои ветераниии кишварҳои узви Иттиҳоди Давлатҳои Мустақил пасфардо дар шахри Минск баргузор мешавад.
Тавре ба ОИ «Азия-Плюс» мушовири хадамоти матбуоти Кумитаи иҷроияи Иттиҳод – Мария Гутсало хабар дод, дар ҷаласа масоили вобаста ба ташкили сохторҳои давлатӣ оид ба ҳамоҳангсозии фаъолияти созмонҳои собиқадорон дар кишварҳои узви Иттиҳод ва расонидани кӯмакҳои молиявӣ аз тарафи давлат ба онҳо баррасӣ мегардад.
Ба гуфтаи хонум Гутсало, ба лоиҳаи мазкур ҳамчунин пешниҳодҳо ба Шӯрои ҳамоҳангсозии Иттифоқи байналмилалии «Иттиҳоди ташкилотҳои ҷамъиятии собиқадорони давлатҳои мустақил» ҷиҳати идомаи ҳимояи ҳамаҷонибаи ҳуқуқу манфиатҳои иқтисодии собиқадорон, фаъол намудани корҳо оид ба тарбияи ватандӯстонаи ҷавонон, ифшои таҳрифгарони таърихи рушди кишварҳои узви Иттиҳоди Давлатҳои Мустақил ворид гардидааст.
Баъди мувофиқаи комил, санади мазкур барои баррасӣ ба Шӯрои сарони кишварҳои узви Иттиҳод пешниҳод мегардад.
