Душанбе. 16-уми декабр. ОИ «Азия-Плюс» –
IFC
(Корпоратсияи Байналхалқии Молиявӣ), узви ташкилотҳои гурӯҳи Бонки умумиҷаҳонӣ, санаи 12 декабр барои 20 нафар фермерон аз ноҳияи Файзобод семинаре оид ба ҳосилнокӣ ва даромаднокии истеҳсоли шир гузаронид. Чорабинии мазкур як қисми силсилаи семинар ва омӯзишҳое буд, ки Лоиҳаи
IFC
оид ба рушди системаи таъминоти маҳсулоти кишоварзӣ дар Тоҷикистони ҷанубӣ дар ноҳияҳои Ваҳдат, Рӯдакӣ, Турсунзода, Ҳисор ва Ёвон гузаронид. Дар семинарҳо умуман 987 нафар
иштирок карданд, ки 962 нафари онҳоро занон ташкил доданд.
Мақсад аз гузаронидани семинари мазкур баланд бардоштани донишу малакаи хонаводаҳои ширистеҳсолкунанда оид ба тартиб додани нақшаи оддии хӯронидани чорво, аз ҷумла тайёр намудани ратсиони хӯрока ва истеҳсоли хӯроки дорои сифати баланд буд.
Дар охири семинар мутахассисони
IFC
бо мақсади ба роҳ мондани ҳамкорӣ байни истеҳсолкунандагон ва коркардкунандагони шир
хонаводаҳоеро муайян намуданд, ки барои фурӯш ба коркардкунандагони маҳаллӣ шири кофӣ истеҳсол мекунанд.
“Мо ба семинар намояндагони хонаводаҳо, бештар занҳоро даъват кардем, то ба онҳо барои оғоз кардани фаъолияти соҳибкориашон кӯмак расонем. Ман умедворам, ки донишу малакае, ки иштирокчиён аз семинар меомӯзанд, ба онҳо барои баланд бардоштани ҳосилнокии шир кӯмак мерасонад, ки ин дар навбати худ ба даромаднокии бештари фаъолияти хонаводаи онҳо оварда мерасонад”, – гуфт агрономи
IFC
Муҳиддинҷон Нурматов.
Бино ба гуфтаҳои иштирокчии семинар Анзарат Сафиева то ин дам онҳо дар асоси дониши худ чорвояшонро мехӯрониданд. «Акнун мо чӣ гуна дуруст хӯронидани чорворо барои бисёртар истеҳсол кардани шир омӯхтем. Чизи аз ҳама муҳим барои мо ин аст, ки
IFC
системаи таъминоти ширро ба коркардкунандагони маҳаллӣ, ки таи солҳои охир фаъол набуд, аз нав барқарор карда истодааст. Ин ба мо имкон медиҳад, ки даромади худро аз истеҳсоли шир зиёд намоем ва як қадами дигар ба пеш ба сӯи пешравӣ ниҳем» – илова кард ӯ.
Лоиҳаи мазкур аз ҷониби Оҷонсии Шветсия оид ба ҳамкорӣ барои рушди байналхалқӣ (
Sida
) маблағгузорӣ шудааст. Дар ин бора мутахассис оид ба робита бо ҷомеаи
IFC
Муҳиддин Тоҷиев хабар дод.
