Душанбе. 5-уми январ. ОИ «Азия-Плюс» – Соли равон кормандони Агентии назорати маводи нашъаовари назди президенти Тоҷикистон миқдори нахустини маводи мухаддирро мусодира карданд. Чанде қабл дар натиҷаи баргузории амалиёти фаврӣ-ҷустуҷӯӣ сокини ноҳияи Ҳамадонӣ боздошт шуд.
Тавре ба ОИ «Азия-Плюс» аз шӯъбаи робита бо ҷомеаи агентии мазкур хабар доданд, зимни кофтукови манзили зисти муваққатии шаҳрванди боздоштшуда дар шаҳри Душанбе ба миқдори 2 килову
530 грамм
маводи сахттаъсири ҳероин ва
1,4 грамм
маводи ҳашиш дарёфт ва мусодира карда шудааст.
Ба иттилои манбаъ, маводи мухаддир дар 278 бастаи селлофанӣ ҷой карда шуда, барои интиқол дар дохили меъда ба хориҷи кишвар пешбинӣ шуда будааст. Ҳамчунин зимни баргузории амалиёти дигар шарики ӯ – шаҳрванди Афғонистон Ҳоҷӣ Ғулом валади Ҷӯрахон низ боздошт шудааст. Аз рӯи ин далелҳо дар шӯъбаи тафтишоти агентӣ парвандаи ҷиноӣ оғоз гардида, гумонбаршудагон дар боздоштгоҳи муваққатии агентӣ қарор доранд.
