Душанбе. 23-уми январ. ОИ «Азия-Плюс» – Ба ташкилотҳои диние, ки дар қаламрави Тоҷикистон амал мекунанд, лозим меояд пас аз қабули лоиҳаи нави қонун «Дар бораи озодии виҷдон ва ташкилотҳои динӣ» дубора аз қайд гузаранд. Ёдовар мешавем, қонуни мазкур аз соли 1994 амал мекунад.
Тавре имрӯз дар нишасти матбуотӣ вазири фарҳанги ҷумҳурӣ Мирзошоҳрух Асрорӣ изҳор дошт, ҳукумати ҷумҳурӣ аз вазорат дархост кардааст, то ҷиҳати таҳияи консепсияи сиёсати давлатӣ оид ба дин пешниҳоду тавсияи худро ироа намоянд. «Мо пешниҳод сохтем, ки пас аз қабули қонуни нав «Дар бораи озодии виҷдон ва ташкилотҳои динӣ» ба ин кор машғул хоҳем шуд, зеро консепсияи нав бояд пурра ба талаботи қонун ҷавобгӯ бошад», – гуфт ӯ.
Тибқи маълумоти вазорат, феълан дар Тоҷикистон 258 масҷиди ҷомеъ, 2841 масҷидҳои намози панҷгона, 83 ташкилотҳои динӣ (ғайриисломӣ), 87 ҷамоатхона, 18 мадраса ва як Донишкадаи исломӣ амал мекунанд.
