Душанбе. 7-уми феврал. ОИ «Азия-Плюс» – Бахшида ба таҷлили ҷашни 50-умин солгарди таъсисёбӣ Иттифоқи журналистони Тоҷикистон бо собиқадорони соҳаи журналистика як қатор вохӯриҳо доир месозад.
Тавре котиби масъули ИЖТ Пӯлод Нуров ба ОИ «Азия-Плюс» хабар дод, вохӯрии нахустин ба хотири гиромидошти ёдбуди журналисти маъруф Мақсуди Ҳусейн 27-уми феврал доир хоҳад шуд, ки ба 55-солагии зодрӯзи ӯ бахшида мешавад.
Ба қавли П.Нуров, дар вохӯриҳо ҳамаи хоҳишмандон, бахусус рӯзноманигорони ҷавон иштирок карда метавонанд. «Рузноманигорони ҷавон дониши назариявии хуб доранд, вале тавсияҳои амалӣ аз журналистони таҷрибадор барои онҳо ниҳоят зарур аст ва тавассути чунин вохӯриҳо мо ният дорем, ин иқдомро рӯи кор орем», – гуфт П.Нуров ва афзуд, ки ИЖТ чунин вохӯриҳоро дар як моҳ як ё ду бор баргузор хоҳад намуд.
