Душанбе. 14-уми март. ОИ «Азия-Плюс» – Имрӯз вазири молияи ҶТ Сафаралӣ Наҷмиддинов дар ҷамъи рӯзноманигорон изҳор дошт, ки нишонаҳои таъсири бӯҳрони молӣ ба иқтисоди кишвар дар семоҳаи аввали соли ҷорӣ бештар эҳсос мегарданд.
Ба гуфтаи ӯ, дар давраи ҳисоботӣ қурби асъори миллӣ нисбат ба доллари ИМА 11 дарсад поин рафта, нишондиҳандаҳои савдои хориҷӣ дар муқоиса бо ҳамин давраи соли гузашта ба андозаи 22,4 дарсад коҳиш ёфтанд. Ҳаҷми воридоти маблағҳои муҳоҷирони меҳнатӣ ба миқдори 25 дарсад камтар шуда, мизони таваррум 1,2 дарсадро ташкил додааст.
С.Наҷмиддинов зикр кард, ки даромадҳои нақшавӣ ба буҷаи давлатӣ ба миқдори 84,7 дарсад ба иҷро расида, қисми хароҷоти буҷа дар ҳаҷми 80 дарсад иҷро шудааст. «Вазъи мазкур бар асари таъсири бӯҳрони молӣ ва коҳиши ҳаҷми содирот ба амал омад», – гуфт ӯ.
Вазири молия таъкид сохт, ки қарзи хориҷии Тоҷикистон ба 1,370 млн. доллари ИМА баробар буда, нисбат ба Маҷмӯи маҳсулоти дохилӣ 24 дарсадро ташкил медиҳад.
