Кӯлоб. 3-юми июн. ОИ «Азия-Плюс» –
Миёни 10 ноҳияи минтақаи Кӯлоби вилояти Хатлон дар ноҳияҳои Фархору Ҳамадонӣ аз аввалинҳо шуда ба дарави ғалла шурӯъ карданд.
Чӣ тавре ки ба ОИ «Азия-Плюс» сармутахассиси раёсати кишоварзии минтақа Абдулло Раҷабов иттилоъ дод, дирӯз дар ноҳияҳои номбурда ҳосили ғалла дар майдони
130 гектар
ҷамъоварӣ гардида, ҳосили гандуми
20 гектар
кӯфта шуд. «Ҳосили як гектар 26 сентнерро ташкил дод, ки вақтҳои ахир ин миқдор ҳосил ба мушоҳида нарасида буд», – гуфт ӯ.
Ба гуфтаи мутахассиси масоили марбут ба техникаи раёсат Аҳмад Сафаров, барои мавсими дарави соли равон 112 комбайни ғалладаравӣ омода гардида, боз ҳудуди 200 комбайн дар ихтиёри хоҷагидорони хусусӣ мебошад. «Соли равон ҷамъоварии ҳосили ғалла дар
89 гектар
замини минтақа сурат мегирад», – гуфт ӯ.
Дар ҳамин ҳол, аз Вазорати кишоварзии ҷумҳурӣ иттилоъ доданд, ки мавсими дарави ғалла дар саросари ҷумҳурӣ рӯзи 10-уми июн оғоз гардида, тибқи маълумоти дар ихтиёрдоштаи вазорат, ба мавсими дарави зироати ғалладона дар ҳамаи субъектҳои хоҷагидории ҷумҳурӣ дар ҳоли мавҷуд будани 1 ҳазору 121 адад комбайни ғалладаравӣ, то имрӯз ҳамагӣ 600 комбайн ба кор омода гардидааст. «То оғози мавсим шумори комбайнҳо афзуда хоҳад шуд, зеро омода сохтани онҳо ба мавсим то ҳанӯз идома дорад», – гуфтанд дар вазорати кишоварзӣ.
Ёдрас мекунем, ки соли равон дар майдони 216 ҳазор гектар зироати ғалладона кишт гардидааст, ки зиёда аз 120 ҳазор гектарашро заминҳои обӣ ташкил медиҳанд. Дар вазорат мутмаинанд, ки имсол кишоварзон беш аз 1 млн. тонна ҳосили зироатҳои ғалладона ба даст хоҳанд овард.
