Душанбе. 3-юми июн. ОИ «Азия-Плюс» – Дар Тоҷикистон офатҳои табиӣ идома доранд.
Чӣ тавре ки ба ОИ «Азия-Плюс» аз Кумитаи ҳолатҳои фавқулодда ва мудофиаи граждании назди ҳукумати ҶТ иттилоъ доданд, ҷараёни сел пули миёни деҳаҳои Тагоб ва Оби меҳнати ноҳияи Раштро хароб сохта, дар қишлоқи Навдӣ як манзили зист пурра хароб гардидааст. «Оилаи аз манзили зист маҳрумшуда ба ҷойи бехавф кӯчонида шуд», – гуфт манбаъ.
Ба иттилои манбаъ, ҷараёни сели омехта бо лойқаву санг дар деҳаи Промсовхози ҷамоати Дарбанди ноҳияи Нуробод боиси нобуд гардидани 46 саршумори чорвои калони шохдор ва 41 сар чорвои хурди хонагӣ шудааст. Дар ин ҷо
3 гектар
заминҳои киштро об шуста, хушбахтона, талафоти ҷонӣ ба қайд гирифта нашудааст.
Тибқи маълумоти кумита, дар ноҳияи Тоҷикобод шамоли шадид боми 10 хонаро хароб сохта, ҷараёни сел ба
20 гектар
заминҳои кишт,
60 гектар
боғ,
1,5 км
хати шабакаи барқ, 1 трансформатор ва
4 км
роҳи мошингарди миёни деҳаҳои Нӯшор ва Ширинчашма осеб расонидааст.
Зикр гардид, ки дар ноҳияи Дарвоз сели фаромада ҳаракати нақлиёт дар километри 382-юм ва 305-уми роҳи мошингарди Душанбе-Хоруғро ғайриимкон сохтааст.
