Душанбе. 16-уми июн. ОИ «Азия-Плюс» – Бонки рушди Осиё барои Тоҷикистон дар тӯли солҳои 2009-2013 Стратегияи ҷадиди шарикӣ таҳия месозад.
Чӣ тавре ки ба ОИ «Азия-Плюс» аз БРО иттилоъ доданд, маъқулшумории барномаи мазкур аз ҷониби Шӯрои мудирони бонк моҳи октябри соли ҷорӣ ба нақша гирифта шудааст. «Ҳафтаи гузашта БРО корҳои таҳияи стратегияро ба анҷом расонида, дар ҷараёни он бо намояндагони ҳукумат, ҷомеаи шаҳрвандӣ, бахши хусусӣ, кишварҳову созмонҳои мададрасон ва дигар ҷонибҳои манфиатдор машваратҳои пурмӯҳтаво доир намуд», – гуфтанд дар бонк.
Ба иттилои сарчашма, миқдори кӯмакҳои бебозгаште, ки барои ҷудо кардан ба Тоҷикистон тӯли солҳои 2009-2010 пешбинӣ шудааст, 102 млн. $ арзёбӣ мешавад. «Барномаи ҷадиди БРО оид ба Тоҷикистон асосан сармоягузорӣ дар соҳаҳои энергетика ва нақлиёт ва ҳамчунин ислоҳоти куллӣ дар бахши хусусиро дар бар мегирад», – афзуд манбаъ.
