Қӯрғонтеппа. 23 май. «Азия-Плюс» — Боздоштгоҳи муваққатии шӯъбаи корҳои дохилии шаҳри Кӯрғонтеппа барои муддате чанд баста шуд.
Тавре ба ОИ «Азия-Плюс» муовини додситони шаҳри Қӯрғонтеппа Маҳмадсаид Насимов хабар дод, дар ҷараёни баргузории санҷишҳо ошкор шудааст, ки боздоштгоҳи муваққатии мазкур дар шӯъбаи корҳои дохилии шаҳр барои нигоҳ доштани гумонбаршудагон ба талаботи санитариву гигиении дар меъёрҳои қонун зикршуда ҷавобгӯ нест. «То анҷоми сохтмони бинои нави боздоштгоҳ дар шӯъбаи корҳои дохилии шаҳри Қӯрғонтеппа, ки ба талаботи санитариву гигиенӣ мувофиқи меъёрҳо ҷавобгӯ бошад, гумонбаршудагон дар боздоштгоҳи муваққатии Раёсати корҳои дохилии вилояти Хатлон нигаҳдорӣ карда мешаванд», – гуфт ӯ.
Қобили зикр аст, ки бинои шӯъбаи корҳои дохилии шаҳри Қӯрғонтеппа яке аз биноҳои қадимаи шаҳр шуморида шуда, боздоштгоҳи муваққатӣ дар таҳхонаи он воқеъ буд.
