Душанбе. 29-уми июн. «Азия-Плюс» — | Нимаи дуввуми имрӯз президенти Тоҷикистон Эмомалӣ Раҳмон роҳбари маъмурияти президенти Русия Сергей Наришкин ва вазири мудофиаи Русия Анатолий Сердюковро ба ҳузур мепазирад.
Тавре ба ОИ «Азия-Плюс» як манбаъ аз ҳукумати кишвар хабар дод, дар мулоқот баррасии масоили муҳими муносибатҳои дуҷонибаи Тоҷикистону Русия ва сафари давлатии қарибулвуқӯъи президенти Русия Дмитрий Медведев ба Тоҷикистон дар аввали моҳи сентябри соли ҷорӣ дар назар аст.
Ғайр аз ин, Эмомалӣ Раҳмон имрӯз мудири иҷроияи Шӯрои мудирони Бонки осиёгии рушд Ашока Ласириро низ ба ҳузур мепазирад. Дар ҷараёни мулоқот баррасии масъалаҳои сармоягузории бонк ба бахшҳои нақлиёт, энергетика ва кишоварзии Тоҷикистон пешбинӣ шудааст. «Ҳамчунин сарвари давлат имрӯз бо гурӯҳи намояндагони ширкатҳои бузурги Арабистони Саъудӣ, ки ҷиҳати иштирок дар кори Шӯрои сармоягузорони Тоҷикистону Арабистони Саъудӣ ба Душанбе ташриф овардаанд, мулоқот хоҳад орост», – гуфт манбаъ.
Ба иттилои манбаъ, дар ҷараёни ин мулоқот масъалаҳои марбут ба имкони сохтмони корхонаҳои муштарак оид ба истеҳсоли пластика, коркарди маҳсулоти кишоварзӣ, роҳандозии ҳамкорӣ дар бахшҳои ҳавопаймоӣ, сайёҳӣ ва гайра баррасӣ мешаванд.
