Душанбе. 3-юми август. «Азия-Плюс» — | Субҳи имрӯз президенти Тоҷикистон ҷиҳати шиносоӣ бо вазъи иҷтимоиву иқтисодӣ ва ҳамчунин ҷараёни баргузории ислоҳот дар бахшҳои кишоварзиву саноати минтақаи шимоли ҷумҳурӣ ба вилояти Суғд сафар кард.
Тавре ба ОИ «Азия-Плюс» як манбаъ аз ҳукумати ҷумҳурӣ хабар дод, дар рафти сафар сарвари давлат аз шаҳрҳои Панҷакент, Истаравшану Хуҷанд ва ноҳияи Бобоҷон Ғафуров боздид карда, дар маросими ифтитоҳи як қатор иншооти ба муносибати ҷашни 20-умин солгарди истиқлол бунёдгардида иштирок хоҳад кард.
Ҳамчунин иштирок ва суханронии президенти Тоҷикистон дар маҷлиси фаъолони шаҳру навоҳии номубурда дар назар аст.
Ба қавли манбаъ, дар ҷараёни вохӯриҳои президенти кишвар бо намояндагони бахшҳои гуногуни кишоварзиву иқтисод ба масъалаи таъмини амнияти ғизоӣ, баргузории кишти такрорӣ ва рушди имконоти саноатии минтақа таваҷҷӯҳи хосса зоҳир хоҳад гардид.
