Дар оташдонҳои махсуси Агентии назорати маводи нашъаовари назди президенти Тоҷикистон дар шаҳри Душанбе беш аз 116 кило маводи мухаддир сӯзонида шуданд. Аз ин миқдор маводи мухаддир 24,8 килояшро героин, ҳудуди 68 килояшро ҳашиш, 24 килояшро афюн ва 131 граммашро маводи нашъаовари гурӯҳи канннабис ташкил дод.
Тавре ба ОИ «Азия-Плюс» аз агентии мазкур хабар доданд, ҳамчунин 115 грамм ҳабҳои психотропии MDMA ва ҳабҳои гурӯҳи кодеин (codeine) ба миқдори 100 дона низ нобуд карда шуданд.
Маводи мухаддири нобудшуда аз ҷониби тамоми сохторҳои мақомоти ҳифзи ҳуқуқи кишвар мусодира гардида, дар 4 парвандаи ҷиноӣ, ки нисбат ба онҳо ҳукм содир шудааст, ба сифати далели шайъӣ истифода шудаанд.
Дар муддати 12 сол аз замони таъсиси Агентии назорати маводи нашъаовари назди президенти Тоҷикистон дар оташдонҳои он 13,5 тонна маводи мухаддир нобуд карда шудааст.
