Оид ба далели задухӯрд миёни шаҳрвандони Тоҷикистону Ӯзбекистон, ки шоми 11-уми октябр дар қисмати ҷанубу шарқии шаҳри Маскав ба вуқӯъ пайваст, парвандаи ҷиноӣ боз шуд.
Бино ба маълумоти сафорати Тоҷикистон дар Русия, қазияи мазкур таҳти назорати ҷиддии сафорат қарор дошта, тамоми ҷузъиёти он пас аз тафтишоти пешакӣ манзури ҳамагон хоҳад шуд.
Гуфта мешавад, дар задухӯрд тақрибан 20 нафар аз ду ҷониб ширкат варзида, бар асари он ду нафар шаҳрвандони Тоҷикистон – Х.Зубайдуллоеви 27-сола ва И.Қурбонови 32-сола осеб диданд, ки айни замон дар яке аз беморхонаҳои шаҳри Маскав бистарианд. «Вазъи саломатии онҳоро табибон қаноатбахш мешуморанд», – гуфтанд дар сафоратхона.
Қаблан хабар дода шуда буд, ки шоми11-уми октябр дар натиҷаи задухӯрд миёни гурӯҳи муҳоҷирони меҳнатии тоҷику ӯзбек дар шаҳри Маскав 4 нафар осеб дида, бо осори зарби корд ба беморхона мунтақил шуданд.
