Шаби 2-юми январ дар кӯчаи Синои пойтахт сокини 24-солаи шаҳри Душанбе Парвиз Давлатбеков, ки сарулибоси Бобои Барфӣ пӯшида буд, ба қатл расонида шуд.
Тавре ба ОИ «Азия-Плюс» хешовандону наздикони фавтида хабар доданд, ӯ аз ҷониби як гурӯҳи ҷавонон, ки дар хиёнат ба мазҳаб ӯро муттаҳам сохта, фарёд мезаданд, ба қатл расонида шудааст.
Бино ба маълумоти намояндаи ВКД Тоҷикистон, пас аз ин ҳодиса П.Давлатбеков бо ҷароҳатҳои зиёд аз зарбаи корд ба яке аз беморхонаҳои пойтахт оварда шудааст, вале сарфи назар аз кӯшишҳои табибон, ба ҳуш наомада, ҷон додааст.
«Ба гумонбарӣ дар содир намудани ин ҷиноят донишҷӯйи соли саввуми Донишгоҳи миллии Тоҷикистон Шариф Давлатов ва ҳамроҳони ӯ Фаррух Самиев ва Фирӯз Нарзуллоев боздошт шуданд», – гуфт намояндаи ВКД.
Тибқи фарзияи наздикони марҳум, П.Давлатбеков қарор додааст, ки хешовандону наздиконашро бо Соли нави мелодӣ табрик кунад ва ба ин муносибат сарулибоси Бобои барфиро пӯшидаааст. Ҳангоме ки ӯ ба даромадгоҳи назди хонаи худ меояд, як гурӯҳи иборат аз 30 нафара ба ӯ дарафтода, бо нидоҳои «Ту кофирӣ» ба ӯ чанд зарбаи корд мезананд.
Қабл аз Соли нав, 30-юми декабр муфтии Тоҷикистон Саидмукаррам Абдуқодирзода изҳор кард, ки мусалмонони кишвар Соли нави мелодиро набояд ҷашн гиранд. Ба андешаи ӯ, ҷашни Соли нав мухолиф ба қонунҳои ислом ва анъанаҳои миллии тоҷикон аст.
