Суди вилояти Хатлон мактуби шикоятии мудири кули ширкати Rolkan Investments LTD Сергей Полуяновро барои баррасӣ қабул накарда, онро бозпас фиристод, зеро дар он иштибоҳот ҷой доштанд. Дар ин бора ба ОИ»Азия-Плюс» аз канселярияи суди вилоят хабар доданд.
Ба иттилои манбаъ, ширкати мазкур ба суди вилояти Хатлон аз болои ҳукми суди шаҳри Қӯрғонтеппа шикоят бурда, мусодираи ду ҳавопаймои ширкатро нодуруст мешуморад.
Ба гуфтаи адвокати ширкат Ғулом Бобоев, Полуянов ба ӯ нусхаи шикоятро фиристодааст ва мусодираи ду ҳавопаймои навъи Ан-72-ро ғайриқонунӣ медонад.
«Суд муқаррар кардааст, ки халабонони ҳавопаймоҳо, шаҳрвандони Русияву Эстония Владимир Садовничий ва Александр Руденко мувофиқи қарордод ба кор қабул шуда, дар Афғонистон фаъолият доштанд. Мувофиқи шартҳои қарордод, ҳавопаймоҳо аз ҷониби ширкати Aerospace Consortium ба иҷора гирифта шуда, халабонон ҷиҳати ихтиёрдорӣ ва истифодаи ҳавопаймоҳо мувофиқи салоҳдиди худ ҳуқуқ надоштанд», – зикр мегардад дар нусхаи шикоят.
Ҳамчунин дар мактуби шикоятӣ зикр гардидааст, ки ҳавопаймоҳо моликияти ширкат маҳсуб ёфта, мутобиқи меъёрҳои байнулмилалӣ дар сурати хилофи қонун рафтор накардани молики он, ба мусодираи он ҳуқуқ дода намешавад. «Ширкати мо нисбат ба Тоҷикистон бо истифода аз ин ҳавопаймоҳо ҳеҷ қонуншикание содир накардааст», – омадааст дар шикоят.
Адвокати ширкат мегӯяд, мақомоти раҳбарии ширкат бар ин назар аст, ки мақомоти тафтишоти пешакии Тоҷикистон иштибоҳан ҳавопаймоҳоро далели шайъӣ шуморидаанд, зеро онҳо то ҳанӯз моликияти ширкат буда, халабонон дар ҳавопаймоҳо танҳо супориши ба онҳо вогузоршударо иҷро мекарданд.
«Аз ин рӯ, мақомоти раҳбарии ширкати ҳавопаймоӣ дар робита ба далелҳои зикршуда дархост менамояд, ки дар қисмати мусодираи ҳавопаймоҳо дар ҳукми суди шаҳри Қӯрғонтеппа аз 8-уми ноябри соли 2011 эътироз содир карда шавад», – афзуд адвокат.
