Чанде қабл вохӯрии сардори Хадамоти муҳоҷирати назди Ҳукумати Ҷумҳурии Тоҷикистон Сафиалло Девонаев бо директори Агентии омори назди президенти ҷумҳурӣ Бахтия Муҳамадиева баргузор шуд.
Тавре аз Маркази матбуоти Хадамоти муҳоҷирати назди ҳукумати ҶТ хабар доданд, дар вохӯрӣ ҷараёни иҷроиши Қарори Ҳукумати Ҷумҳурии Тоҷикистон аз 1 августи соли 2008, № 378 «Дар бораи бақайдгирии муҳоҷирати шаҳрвандони Ҷумҳурии Тоҷикистон ба хориҷа ва бозгашт аз хориҷа» мавриди баррасӣ қарор гирифт.
Ба иттилои манбаъ, ҷонибҳо доир ба ташкил намудани гурӯҳи корӣ барои ба роҳ мондани назорати қатъӣ ва дақиқи омаду рафти муҳоҷирони меҳнатӣ дар нуқтаҳои наздисарҳадӣ, истгоҳҳои роҳи оҳан ва ҳавоии Ҷумҳурии Тоҷикистон ба мувофиқа расиданд.
Ёдрас мекунем, ки зимни суханронӣ дар ҷаласаи ҷамъбасти фаъолияти ҳукумати кишвар дар соли 2011 сарвари давлат Эмомалӣ Раҳмон масъалаи носаҳеҳ будани маълумоти оморӣ дар бораи муҳоҷирони меҳнатии хориҷи кишварро мавриди интиқод қарор дода буд.
