Намояндагии Институти бритонии инъикоси ҷанг ва сулҳ (IWPR) дар Тоҷикистон ба баргузории медиа-мактаб оид ба рушди жанри таҳқиқоти журналистӣ дар Тоҷикистон шурӯъ мекунад.
Дар доираи ин медиа-мактаб бо 15 нафар журналистони ҷавони шаҳрҳои Хоруғу Хуҷанд ва Душанбе оид ба тарзҳои муосири ҷамъоварии маълумоту коркарди он ва дурнамои ворид шудани онҳо ба шабакаи байнулмилалии журналистон – муҳаққиқони SCOOP машғулиятҳои таълимӣ гузаронида мешаванд.
Омӯзиш дар ду давра сурат мегирад. Давраи аввал (5-9-уми июн) аз тренинги фаъоли панҷрӯза иборат аст. Давраи дуюм пас аз се моҳ доир гардида, ду рӯз идома меёбад.
Барои панҷ нафар иштирокчиёни бештар фаъоли тренинг барои тақвияти малакаҳои амалии таҳқиқотӣ дар дафтари украинии SCOOP таҷрибаомӯзии дуҳафтаина пешбинӣ шудааст.
Дар муддати ҳашт моҳ иштирокдорони лоиҳа доир ба мушкилоти бештар доғи ҷомеаи муосири Тоҷикистон на камтар аз 12 таҳқиқоти журналистӣ доир намуда, сипас ин мавод дар нашриёти чопиву электронии маҳаллӣ ва тарҷумаашон бо забонҳои русиву англисӣ дар ВАО-и байнулмилалӣ ба чоп мерасанд.
Лоиҳаи «Лабораторияи таҳқиқоти журналистӣ» бо дастгирии молиявии Шӯъбаи Ташкилоти байнулмилалии Институти «Ҷамъияти кушода» – Бунёди Мадад дар Тоҷикистон татбиқ мегардад.
