Сафорати Иёлоти Муттаҳидаи Амрико дар робита бо хушунати ба наздикӣ дар Вилояти Мухтори Кӯҳистони Бадахшони Тоҷикистон суратгирифта ва талафоти ҷонии гузориш додашуда хеле нигарон аст, – гуфта мешавад дар изҳороти интишоргардидаи сафорати ИМА дар Тоҷикистон.
«Мо дар робита бо ба ҳалокат расидани одамон ҳамдардии худро изҳор намуда аз амнияти сокинони осоишта ҳангоми гузаронидани амалиётҳои роҳбарияти Тоҷикистон нигаронем. Мо даъват ба амал меоварем, то ҳамаи тадбирҳо барои баровардани сокинони осоишта аз минтақаҳои ҷангӣ, аз он ҷумла шаҳрвандони хориҷие, ки айни ҳол дар шаҳри Хоруғ маҳкам шудаанд, андешида шаванд», – зикр мегардад дар изҳорот.
Ҳамчунин дар изҳорот аз Тоҷикистон даъват мешавад, то ҳамеша ҳуқуқ ва озодиҳои асосии инсон, аз он ҷумла озодии сухан ва ҷараёни озоди иттилоотро эҳтиром намояд. «Мо аз Тоҷикистон даъвати қатъӣ ба амал меоварем, ки ӯҳдадориҳои байналмиллалии худро тавассути гузаронидани тафтишоти шаффофи ҳодисаҳое, ки дар сарҳад ба вуқӯъ пайвастаанд иҷро намояд, ва ҳуқуқи ҳар як боздоштшударо, аз он ҷумла дастрасии онҳоро ба ҳимояи ҳуқуқӣ, муносибати башардӯстона, ва додрасии боадолат кафолат диҳад», – омадааст дар фарҷоми изҳорот.
