Имрӯз дар пойтахти Қирғизистон ҷаласаи 12-уми Шӯрои роҳбарони Хадамоти муҳоҷирати кишварҳои узви ИДМ ва ҷаласаи 11-уми Шӯрои сиёсати муҳоҷирати назди Кумитаи ҳамгиройии Иттиҳоди иқтисодии Авруосиё (ЕвраЗЭС) ба кор шурӯъ мекунад. Дар кори ин ҷаласаҳо сардори Хадамоти муҳоҷирати назди ҳукумати ҶТ Сафиалло Девонаев ширкат меварзад.
Тавре аз шуъбаи робита бо ҷомеаи Хадамоти муҳоҷирати ҷумҳурӣ хабар доданд, дар ҷаласа мушкилоти муҳоҷирати ғайриқонунӣ ва вазъи муҳоҷират дар паҳнои ИДМ мавриди баррасӣ қарор мегирад.
Ба иттилои манбаъ, дар ҷаласаҳо ҳамчунин баррасии консепсияи сиёсати давлатии муҳоҷирати Русия то соли 20125, нақшаҳои муштараки мубориза бо муҳоҷирати ғайриқонунӣ ва дигар масоили рӯзмарра дар ин соҳа дар назар аст.
Иштирокдорони ҷаласа инчунин атрофи масоили раванди татбиқи қарори Шӯрои сарони ҳукуматҳо, Шӯрои вазирони корҳои хориҷии кишварҳои ИДМ, Шӯрои роҳбарони сохторҳои муҳоҷиратии кишварҳои ИДМ дар соҳаи муҳоҷират, раванди татбиқи қарори Шӯрои байнидавлатии ЕврАЭС ва татбиқи барномаи муҳоҷирати меҳнатӣ дар якҷоягӣ бо Созмони байналмилалии муҳоҷират низ табодули назар хоҳанд кард.
