Дар ҳодисаи сӯхтори яке аз бузургтарин бозорҳои масолеҳи сохтмони шаҳри Душанбе бо номи «Ҷал-Ҷам» кафшергар гунаҳкор дониста шуд.
Тавре ба ОИ «Азия-Плюс» аз Сарраёсати Хадамоти оташнишонии ВКД ҶТ хабар доданд, сӯхтор бар асари истифодаи нодурусти дастгоҳи кафшергарӣ ва риоя накардани қоидаҳои бехатарӣ сар зада, нахуст дар яке аз анборҳо ва сипас ба дигар нуқтаҳои фурӯш паҳн шуда, дар маҷмӯъ 135 метри мураббаъро фаро гирифтааст.
«Ба ҷойи ҳодиса дарҳол 13 гурӯҳи оташнишонӣ ва ду автомашинаи обкаш ҳозир шуда, ба туфайли чораҳои андешидаи онҳо, сӯхтор зуд хомӯш карда шуд», – гуфт манбаъ ва илова намуд, ки аз сӯхтор касе осеб надидааст.
Зимнан зикр гардид, ки давоми сол хадамоти оташнишонӣ вазъи бозоро санҷида, ба раҳбарияти он ҷиҳати риоя кардани қоидаҳои бехатарии сӯхтор дастур додааст. «Зимни санҷиши такрорӣ барои бартараф насохтани камбудиҳо 13 нафар соҳибкорони бозор ба маблағи беш аз 2 ҳазор сомонӣ ҷаримабандӣ шуда буданд», – гуфт манбаъ.
Қобили зикр аст, ки айни замон таҳқиқи ҳодиса мазкур идома дошта, ҳаҷми зарари расида аз сӯхтор муайян карда мешавад.
