Кормандони мақомоти милисаи шаҳри Душанбе аз як ҳодисаи қочоқи маснӯоти заргарӣ аз Туркия ба Тоҷикистон ҷилавгирӣ намуданд.
Бино ба маълумоти Вазорати корҳои дохилии ҷумҳурӣ, дар ҳудуди фурудгоҳи байналмилалии пойтахт ба гумони даст доштан дар қочоқи маснӯоти заргарӣ сокини шаҳри Душанбе Муқаддас Азимоваи 43-сола боздошт шудааст.
«Ҳангоми азназаргузаронии автомашинаи тамғаи «БМВ Х-6»-и муталлиқ ба ӯ аз дохили сумкаҳои сафарӣ 2 килою 930 грамм маснӯоти заргарии аз тило сохташуда ва 12 килою 10-грамм маснӯоти заргарии аз нуқра сохташуда дарёфт ва мусодира карда шуд», – гуфтанд дар ВКД.
Ба иттилои манбаъ, зимни санҷиш муайян карда шудааст, ки номбурда маснӯоти заргарии мазкурро тариқи қочоқ аз шаҳри Истамбули Туркия тавассути ҳавопаймо ба Тоҷикистон ворид намудааст.
Зимнан зикр гардид, ки аз рӯи ин ҳодиса парвандаи ҷиноӣ боз шуда, тафтиш идома дорад.
