КВД «Тоҷиксуғурта» изҳор кард, ки дар сурати суғуртаи фурӯшгоҳҳо ва маҳсулот, ба ҳар кадоме аз осебдидагони сӯхтори бозори «Корвон» 31 ҳазору 654 сомонӣ (6,5 ҳазор доллари ИМА) маблағи суғурта пардохт мегардид.
Муовини раиси КВД «Тоҷиксуғурта» Абдулло Абдуллоев дар ин робита зикр кард, ки аз тамоми соҳибкорони бозори «Корвон» танҳо 126 нафарашон фурӯшгоҳҳои худро суғурта карда, аз сӯхтор ҳеҷ кадоме аз онҳо зарар надидаанд.
Ба қавли Абдуллоев, кормандони ин муассиса мунтазам соҳибкоронро дар бораи муҳим будани суғуртаи амвол огоҳ мекунанд, вале соҳибкорон аз ҳамкорӣ рӯ метобанд. «Ҳатто миёни 126 нафари зикршуда, ки амволашонро суғурта кардаанд, аксариятро шаҳрвандони Чину Афғонистон ташкил медиҳанд ва ҳамагӣ 5 нафарашон шаҳрвандони Тоҷикистон мебошанд», – гуфт ӯ.
Ба гуфтаи директори филиали «Тоҷиксуғурта» дар ноҳияи Фирдавсии пойтахт Шаримф Каримов, ҳаҷми маблағи солонаи суғуртаи нуқтаи фурӯш 830 сомониро ташкил медиҳад. «Агар онҳо саривақт аз сӯхтор суғурта медоштанд, аллакай маблағи онро мегирифтанд», – таъкид кард номбурда.
Ёдрас мекунем, ки шоми 5-уми сентябр дар бозори фурӯши яклухти «Корвон» сӯхтор сар зада, он майдони беш аз 8 ҳазор метри мураббаъро фаро гирифт. Бар асари сӯхтор 1 нафар ҳалок ва чор нафари дигар ҷароҳат бардоштанд. Оташ 2 ҳазору 550 фурӯшгоҳҳоро нобуд сохта, ба соҳибкорон зарари ниҳоят зиёди моддӣ расонид.
Рӯзи дигари пас аз сӯхтор ҳазорон тоҷирони бозор ба гирдиҳамойӣ даст заданд. Онҳо пайдо намудани гунаҳкорони сӯхторро талаб намуда, бар ин назар буданд, ки бозор қасдан оташ зада шудааст. Издиҳомро раиси пойтахт ором намуда, ваъда дод, ки бозор дар як моҳ барқарор гардида, муҳлати қарзҳои тоҷирон дар бонкҳо дароз карда мешавад.
Қаблан соҳибмулки бозори «Корвон» Нуршед Машрабов изҳор карда буд, ки барои кӯмаку мусоидат ба муайян кардани сабабҳои сар задани сӯхтор ва афроди дар ин амал дастдошта 150 ҳазор сомонӣ мукофотпулӣ таъин кардаст.
