Сармуфаттиши Шуъбаи Вазорати корҳои дохилии Тоҷикистон дар ноҳияи Қубодиёни вилояти Хатлон ба қаллобӣ гумонбар дониста мешавад.
Тавре ба ОИ «Азия-Плюс» як манбаъ аз Раёсати Агентии назорати давлатии молиявӣ ва мубориза бо корррупсияи вилояти Хатлон хабар дод, як зан, сокини ноҳияи мазкур ба Раёсати Агентӣ муроҷиат намуда, изҳор кардааст, ки сармуфаттиши ШВКД-и ноҳияи Қубодиён Қурбонхол Ганҷалов барои қатъ кардани парвандаи ҷиноии писараш, ки дар муҳоҷирати корӣ қарор дорад, аз ӯ 10 ҳазор сомонӣ талаб кардааст.
«Кормандони раёсат Ганҷаловро пас аз гирифтани 1 ҳазор доллари ИМА бо далели шайъӣ дар ҳуҷраи кориаш боздошт карданд», – гуфт манбаъ.
Зимнан зикр гардид, ки нисбат ба Қ.Ганҷалов мутобиқи моддаҳои 247, қ. 4 (Қаллобӣ) ва 323 (Сохтакории хизматӣ)-и КҶ ҶТ парвандаи ҷиноӣ оғоз гардида, тафтишот идома дорад.
