Шабонарӯзи гузашта дар қитъаҳои роҳи мошингарди Душанбе-Чаноқ боришоти шадиди барф ба мушоҳида расид.
Бино ба иттилои хадамоти матбуоти филиали ширкати «Инновейтив Роуд Солюшнз ЛТД» (IRS), тамоми техникаи дар ихтиёрдоштаи намояндагиҳои минтақавии филиал ҷиҳати пешгирии пеш омадани мушкилот барои ҳаракати нақлиёт сафарбар гардида, феълан машғули тоза кардани роҳ аз барф ва коркарди роҳ бо маводи зиддилағзиш мебошанд.
Ба иттилои манбаъ, бориши шадиди барф ва шамоловардҳо ҳаракати нақлиётро дар қитъаҳои алоҳида мушкил сохтааст. Коргарони роҳ қитъаҳои роҳи зертобеъро чанд маротиба бо ҷалби автогрейдерҳо, боркунакҳо ва дигар техникаи мавҷуда аз барф тоза намуда, барои халалдор нашудани ҳаракати мунтазами нақлиёт тадбирҳои зарурӣ андешида истодаанд. Айни замон ҳолати роҳ зери назорати роҳдорони филиал қарор дошта, воситаҳои нақлиёт бемамоният тавассути роҳи автомобилгарди Душанбе-Чаноқ равуо доранд.
Гуфта мешавад, ҷиҳати бартарафсозии яхбандӣ роҳ бо маводи зиддилағзиш коркард шудааст. Чунин намуди корҳо дар намояндагиҳои Зарафшону Варзоб низ иҷро шудаанд. Сафи назар аз аз вазъияти мураккаб, роҳдорон кӯшиш карда истодаанд то ҳаракати мунтазами нақлиёт таъмин бошад. Дар анҷом додани корҳои зикргардида дар минтақаи Варзоб 13 адад, дар минтақаи Зарафшон 7 адад ва дар минтақаи Суғд 19 адад мошину механизмҳо ҷалб карда шудаанд», – забар медиҳад IRS.
Ширкат аз истфодабарандагони роҳ даъват мекунад, ки бо дарназардошти вазъияти баамаломада ва шароити кӯҳистон, бо омодагии ҳаматарафа ба сафар баромада, аз гирифтани изофабор худдорӣ намоянд. Ҳамчунин ба хотири ҷилавгирӣ аз сар задани ҳодисаҳои нохуш шабона ба сафар баромадан тавсия дода намешавад.
