Дар ҷаласаи имрӯзаи Маҷлиси намояндагони Маҷлиси Олии ҶТ вакилони палатаи поёнии парлумон бидуни баррасӣ тағйирот ба қонунҳои конститутсионӣ «Дар бораи Суди конститутсионии ҶТ» ва «Дар бораи судҳои ҶТ»-ро якдилона маъқул шумориданд.
Зимни шарҳи масъала ба вакилон муовини вазири молияи ҶТ Рӯҳулло Ҳакимов изҳор кард, ки тағйироти пешниҳодшуда пеш аз ҳама, ба амалисозии ислоҳоти иқтисодиву иҷтимоии дар кишвар идомадошта нигаронида шудаанд.
«Мувофиқи тағйирот, аз ин ба баъд судяҳои Суди конститутсионии Тоҷикистон пас аз 35 соли фаъолият ба нафақа рафта метавонанд. То имрӯз ин муҳлат ба 20 соли фаъолият баробар буд, – гуфт ӯ. – Ғайр аз ин, то тағйирот ҳаҷми нафақапулии онҳо 80% аз ҳаҷми музздати меҳнатро ташкил дода, пас аз тағйирот он ба 65%-и ҳаҷми музди меҳнат баробар хоҳад шуд».
Тибқи тағйироти қабулшуда ба қонуни конститутсионӣ «Дар бораи судҳои ҶТ», аз ин пас аъзои оилаи кормандони мақомоти судии кишвар дигар аз ҳисоби буҷети давлатӣ бо хизматгузории ройгони тиббӣ ва муолиҷа дар осоишгоҳҳо таъмин карда намешаванд. Аз ин имтиёзот танҳо судяҳои нафақахӯр истифода карда метавонанд.
