Рӯзҳои 7-9-уми март дар Тоҷикистон обуҳавои ноустувор ва боришоти зиёди борону барф дар назар аст.
Тавре ба ОИ «Азия-Плюс» сардори шуъбаи пешгӯии обуҳавои Муассисаи давлатии гидрометеорологияи ҷумҳурӣ Ҷамила Байдуллоева хабар дод, рӯзи 7-уми март дар ҷумҳурӣ борони шадид ва дар доманакӯҳҳо боридани барф пешбинӣ мешавад.
Ба гуфтаи ӯ, рӯзи 7-уми март дар шаҳри Душанбеву вилояти Хатлон ҳарорат аз 23 то 10-15 дараҷа ва дар вилояти Суғд то сифр поин меравад. Нимаи дуюми ҳамин рӯз дар Хуҷанд барф меборад.
Байдуллоева ҳамчунин изҳор намуд, ки дар ҷашни Рӯзи модар – 8-уми март дар шаҳри Душанбеву вилояти Хатлон борон борида, тадриҷан ба бараф мубаддал мегардад. Ҳарорат як дараҷа сард шуда, вазиши шамол аз самти ғарб то 17-22 метр дар як сония тақвият меёбад.
Номбурда ҳамчунин гуфт, рӯзи 9-уми март дар саросари кишвар боридани барф, баъзан барфи шадид дар назар аст. Аммо аллакай рӯзи 10-уми март ҳарорат боло рафта, то 13 дараҷа гарм мешавад.
