Иттиҳоди журналистони Тоҷикистон (ИЖТ) натиҷаҳои озмуни навбатии асарҳои публисистӣ ва маводи журналистӣ барои дарёфти ҷоизаи ИЖТ ба номи Абулқосим Лоҳутӣ барои соли 2012-ро ҷамъбаст намуд.
Тавре ба ОИ «Азия-Плюс» роҳбари комиссия оид ба ҷоизаҳои ИЖТ Умари Шерхон хабар дод, танҳо аъзои ИЖТ ҳуқуқи дар озмун иштигрок карданро дошта, мавод ба озмун аз ҷониби бахшҳои аввалияи ИЖТ ё раёсати муассисаҳои эҷодӣ пешниҳод гардид.
«Дар номинатсияи беҳтарин мавод дар ВАО-и чопӣ мушовири давлатии президенти ҶТ оид ба рушди иҷтимоӣ ва робита бо ҷомеа Саидмурод Фаттоев ва сармушовири давлатии президенти ҶТ оид ба рушди иҷтимоӣ ва робита бо ҷомеа Мансур Сайфиддинов барои очерки «Президенти мардумӣ» ба Ҷоизаи ба номи Лоҳутӣ сазовор дониста шуданд», – гуфт вай.
Ба қавли ӯ, дар ин номинатсия ҳамчунин журналистон Давлатхоҷа Назиров (барои силсилаи очеркҳо таҳти унвони «Фархор – одамони ту»), Илҳоми Ҷамолиён (барои силсилаи очеркҳо дар рӯзномаи вилоятии «Ҳақиқати Суғд»), Зафари Сӯфӣ (барои силсилаи мақолаҳо оид ба мушкилоти ВАО-и тоҷик) ва Беҳрӯзи Забеҳулло (барои таблиғи фарҳанги тоҷикон дар матбуоти хориҷи) низ ба Ҷоизаи ба номи А.Лоҳутӣ шарафёб гардиданд.
«Ҷоиза барои маводи беҳтарин дар радиову телевизонро Гуландом Ашӯрова ва Гулчеҳра Сатторова соҳиб шуданд. Ҷоизаи ба номи Абулқосим Лоҳутӣ барои кори беҳтарини илмиву таҳқиқотии журналистӣ – дастури таълимӣ оид ба журналистика ба Қаҳҳори Расулиён тақдим гардид», – афзуд Шерхон.
Зимнан зикр гардид, ки маросими тақдими ҷоизаҳо ба ғолибони озмун имрӯз дар санаи таҷлили ҷашни Рӯзи матбуоти тоҷик супурда мешавад.
