Санаи 15 марти соли равон бо ташаббуси Ҳизби халқии демократии Тоҷикистон ба ифтихори иди байналмилалии Наврӯз таҳти унвони «Самаранокии иқтисодии соҳаи боғу токпарварӣ ва роҳҳои баланд бардоштани он дар мамлакат» мизи мудаввар доир мегардад.
Бино ба иттилои сомонаи расмии ҲХДТ, чорабинии мазкур ҷиҳати амалӣ намудани барномаҳои ҳизбӣ дар самти рушди соҳаи кишоварзӣ бо супориши муовини якуми раиси ҲХДТ Сафар Сафаров аз ҷониби Маркази таблиғот ва таҳлилии Дастгоҳи Кумитаи Иҷроияи Марказии ҲХДТ дар ҳамкорӣ бо Пажӯҳишгоҳи иқтисоди Академияи илмҳои кишоварзии Тоҷикистон ташкил карда мешавад.
Ба иттилои манбаъ, дар кори мизи мудаввар роҳбарияти ҲХДТ, вакилони палатаи поёнии парлумони кишвар, коршиносону олимон аз Вазорати кишоварзии Тоҷикистон, пажӯҳишгоҳҳои иқтисод ва боғпарварию сабзавоткории Академияи илмҳои кишоварзии Тоҷикистон, бархе аз роҳбарони хоҷагиҳои боғу токпарварӣ ва дигар шахсони масъул ширкат хоҳанд варзид.
