Дар суди шаҳри Душанбе мурофиа навбатӣ нисбати боз яке аз ҷавони навбатӣ, ки ба қатли Парвиз Давлатбеков шаби 1-уми январи соли 2012 гумонбар дониста мешавад, оғоз гардид.
Тавре ба ОИ «Азия-Плюс» аз суди шаҳрии пойтахт хабар доданд, Фирдавс Муродови 22-сола ба авбошӣ гумонбар дониста шуда, он шаб миёни ҷавонони ба Давлатбеков дарафтода ҳузур дошт, вале баъди ҳодиса дарҳол ба Русия паноҳ бурда буд. Баъди чанде ӯ ба Тоҷикистон баргашта, ихтиёрӣ ба мақомоти ҳифзи ҳуқуқ ҳозир шуд.
Моҳи июни соли гузашта ҳамчунин сокини пойтахт Фирӯз Нарзуллоеви 18-сола низ боздошт шуд, ки барои гумонбарӣ ба даст доштан дар қатли Давлатбеков мавриди ҷустуҷӯ эълон шуда буд.
Ёдрас мекунем, ки Парвиз Давлатбеков шаби 1-уми январи соли 2012 бо сарулибоси Бобои Барфӣ наздикону хешовандонашро бо Соли нав табрик карданӣ буд, вале дар натиҷаи ҷанҷол дар кӯча аз зарбаҳои корд ҷароҳат бардошта, рӯзи 2-юми январ дар беморхона ба ҳалокат расид.
Аввали моҳи марти соли гузашта суд нисбати айбдоршавандагон оид ба қазияи марги Парвиз Давлатбеков
ҳукм содир намуд.
Беҳрӯз Шарифови 16-сола дар қатли Парвиз Давлатбеков гунаҳкор дониста шуда, ба муддати 10 соли зиндон маҳкум шуд. Суд ба чунин хулоса расидааст, ки маҳз зарбаҳои ӯ барои П.Давлатбеков марговар будаанд. То ба синни балоғат расидан Шарифов муҳлати ҷазоро дар муассисаи ислоҳотӣ барои ноболиғон адо мекунад.
Судшавандагони дигар – Шараф Давлатов ва Фаррух Самиев мутобиқи моддаи 237 КҶ ҶТ (Авбошӣ) гунаҳкор эътироф гардида, ба муддати 4 сол аз озодӣ маҳрум карда шуданд.
Нисбат ба айбдоршавандаи дигар – ноболиғ Ҳасан Абдурашидов ҷазо дар шакли ҷарима дар ҳаҷми 100 нишондиҳандаи ҳисоб (як нишондиҳандаи ҳисоб ба 40 сомонӣ баробар аст) таъин карда шуд.
