Муддати беш аз 1 моҳ муҳассили Донишгоҳи дӯстии халқҳои Русия, шаҳрванди Тоҷикистон Адим Шаҳбозбековро барои харидани iPhone-и дуздидашуда дар яке аз тавқифгоҳҳои Маскав нигоҳ медоранд.
Бино ба иттилои хабаргузории
MR7.ru
, қабл аз Соли нав Адим аз рӯи эълони дар шабакаи Интернет нашршуда iPhone-и нав мехарад, вале рӯзи 13-уми феврал бинобар сабаби муроҷиати дуздида шудани ин телефон ӯро боздошт мекунанд.
Ба қавли ҳимоягари ӯ Татяна Кирпиченко, ин телефон шоми 31-уми декабр рабуда шуда, ин вақт Адим дар хобгоҳ қарор доштааст, ки онро сабти наворҳои камераҳои видеоӣ ва ҳамсояи ҳуҷраи хобгоҳи ӯ – як донишҷӯи Чин низ тасдиқ мекунанд.
Ҳимоятгар изҳор доштааст, ки духтари ҷабрдида аз ҷониби Адим рабуда шудани телефонро тасдиқ намуда, вале дар рӯбарӯкунии аввал ӯ Адимро гунаҳкор надониста будааст. Баъди гуфтугӯ бо муфаттиш ӯ баёноти худро иваз намудааст.
«Далели замони содир шудани ҷиноят дар хобгоҳ қарор доштани гумонбарро тафтишот ҳоло насанҷида, вале муҳлати нигоҳдории Шаҳбозбеков дар тавқифгоҳ 2 моҳ дароз шуд ва акнун ӯро метавонанд аз донишгоҳ хориҷ кунанд. Ӯ донишҷӯи соли дуюми бахши дандонпизишкӣ аст», – таъкид доштааст ҳимоятгари гумонбар.
Намояндаи расмии сафоратхонаи Тоҷикистон дар Русия Муҳамади Эгамзод дар ин робита ба ОИ «Азия-Плюс» изҳор намуд, ки дар бораи ин қазия дарҳол ба сафири Тоҷикистон дар Русия Абдулмаҷид Достиев маълумот дода шуда, ӯ ба хадамоти консулгарӣ ҷиҳати расидагӣ ба ин ҳодиса ва расонидани кӯмаки зарурии ҳамаҷониба ба донишҷӯи тоҷик супориш додааст.
