Кормандони Раёсати Кумитаи давлатии амнияти миллии ҶТ дар ВМКБ аз рӯйи далели убури ғайриқонунии марзи давлатӣ бо Афғонистон сокини 30-солаи ноҳияи Рӯшон Юсуф Расуловро боздошт намуданд.
Тавре ба ОИ «Азия-Плюс» аз маркази робита бо ҷомеаи КДАМ ҶТ иттилоъ доданд, шаҳрванди боздоштшуда тавассути қаиқи худсохти резинӣ аз дарёи Панҷ ба он сӯи марз гузашта, муддати чанде дар Афғонистон қарор доштааст. Айни замон мақсади убури ғайриқонунии марз аз ҷониби ин шаҳрвандро таҳқиқ мекунанд.
Ба иттилои манбаъ, ҳамчунин ҳаммаслаки қочоқбарони афғон, ки аввали моҳи феврал дар қисмати Ишкошими марз безарар шуда буданд, низ ошкор гардидааст. «Ба гумони мусоидат ба қочоқбарони афғн донишҷӯи Донишгоҳи Осиёи Марказии шахри Хоруғ, шаҳрванди 23-солаи Афғонистон Алидод валади Мирдод боздошт шуд, ки аз қочоқбарон ба ивази 300 дона шишаи арақ овардани 1,5 кило героин ба ВМКБ-ро дархост намудааст», – гуфт манбаъ.
Ёдрас мекунем, ки он замон дар натиҷаи як амалиёти вижа як тан аз шаҳрвандони Афғонистон куштаву ба ду нафар ҳамммаслакони ӯ паноҳ бурдан дар қаламрави кишвари ҳамсоя муяссар гардида, дар макони ҳодиса як адад автомати Калашников бо муҳимоташ дарёфт шуда буд.
