Аз оғози соли равон аз ҷониби корхонаи минтақавии шабакаҳои барқи Кӯлоб ба маблағи 1 млн. 207 ҳазор сомонӣ корҳои таъмир анҷом дода шуданд.
Тавре ба ОИ «Азия-Плюс» директори корхона Мирзо Исмоилов хабар дод, аксари корҳои таъмир баҳри коҳиши талафоти барқ дар хатҳои интиқоли барқ ба иҷро расида, дар зиёда аз 50 км хатҳои интиқоли барқ симҳои пӯлодӣ ба алюминӣ ва буриши хурд ба бузург иваз карда шуданд.
Ба гуфтаи ӯ, 10 адад трансформатори ҷараён ва шиддат низ иваз ва 4 адад трансформатори иловагӣ насб гардиданд. «Қариб тамоми ҳисобкунакҳои индуксионӣ ба ҳисобкунакҳои электронии барқ иваз карда шуданд, ки ба сарфаи нерӯи барқ имкон медиҳанд», – иброз дошт номбурда.
Зимнан зикр гардид, ки дар зарфи се моҳи ҷорӣ маблағи умумии истифодаи нерӯи барқ 11 млн. 180 ҳазор сомонӣ ва ҷамъоварии маблағи он – 9 млн. 251 ҳазор сомониро ташкил додааст, ки ба 82,7% аз маблағи умумӣ баробар мебошад.
