Имрӯз дар ҷаласаи Шӯрои палатаи поёнии парлумон қарор шуд, ки аз 30-юми апрел то 10-уми май вакилони МНМО ҶТ дар тамоми шаҳру навоҳии кишвар бо интихобкунандагон вохӯриҳо барпо мекунанд.
Тавре ба ОИ «Азия-Плюс» сухангӯи палатаи поёнии парлумони ҷумҳурӣ Муҳаммадато Султонов хабар дод, зимни вохӯриҳо бо интихобкунандагон вакилон ба мардум бандҳои асосии Паёми сарвари давлат Эмомалӣ Раҳмон ба парлумон аз 26-уми апрелро шарҳу тавзеҳ медиҳанд.
Ба иттилои манбаъ, вакилон ҳамзамон дар назди интихобкунандагон аз фаъолияти сесолаи худ ҳисобот дода, афкори аҳолӣ оид ба ҳаёти сиёсиву иҷтимоӣ ва иқтисодии кишварро мавриди омӯзиш қарор хоҳанд дод.
