Шаби гузашта дар назди меҳмонхонаи «Қӯрғонтеппа»-и маркази маъмурии вилояти Хатлан ҷасади як ҷавонзани 29-сола, сокини ноҳияи Бохтар дарёфт шуд.
Тавре ба ОИ «Азия-Плюс» сардори шуъбаи ВКД ҶТ дар шаҳри Қӯргонтеппа, полковники милиса Суҳроб Саломов хабар дод, нимашаб ба онҳо дар бораи дарёфти ҷасади як ҷавонзан дар назди меҳмонхона хабар расида, дар ҷойи ҳодиса гурӯҳи фаврӣ ҷасади Гулнора Мавлоноваи 29-сола дарёфт кардааст.
«Дар ҷараёни санҷиши аввалияи ҷойи ҳодиса ва ҷасади марҳум муқаррар гардид, ки ин ҷавонзан аз ошёнаи 3-юми меҳмонхона ба замин афтодааст», – шарҳ дод Саломов.
Зимнан зикр гардид, ки акнун кормандони фавриро зарур аст, ки сабаби марги ҷавонзан – худкушӣ, ҳодисаи нохуш ё куштор будани ин ҳодисаро муайян кунанд.
