Биржаи нави фондӣ ва ё бозори коғазҳои қиматнок дар моҳи июн дар Кумитаи андози назди Ҳукумати Ҷумҳурии Тоҷикистон ҳамчун шахси ҳуқуқӣ ба қайд гирифта шуд.
Тавре ба ОИ «Азия-Плюс» аз Агентии рушди бозори коғазҳои қиматноки Вазорати молияи ҶТ хабар доданд, биржаи фондӣ сохтори тиҷоратӣ ба ҳисоб рафта, бақайдгирии он қадами аввал дар роҳи таъсиси бозори муташаккили коғазҳои қиматнок дар Тоҷикистон мебошад.
«Ҳанӯз дар бораи оғози фаъолияти биржаи фондӣ сухан гуфтан барвақт аст. Имрӯзҳо корҳои омодагӣ ва тайёрӣ ба муҷаҳҳазсозии техникиву барномавӣ ҷараён доранд, роҳбари биржаи фондӣ интихоб гардид. Агар дар хусуси собиқ бозори коғазҳои қиматнок сухан гӯем, пас бояд таъкид кард, ки мӯҳлати амали иҷозатномаи он моҳи феврали соли 2013 ба поён расид ва он тамдид нагардида буд»,- қайд карданд дар Агентӣ.
Дар мавриди ташкили фаъолияти биржаи фондӣ бошад, тавре дар Агентӣ таъкид намуданд, барои роҳ ёфтан ба тиҷорати биржавӣ яке аз талаботи асосӣ гузариши ҷамъиятҳои саҳҳомӣ ба Меъёрҳои байналмилалии тартиби ҳисоботи молиявӣ мањсуб мешавад.
«Бидуни шаффофият дар фаъолияти ҷамъияти саҳҳомӣ ва тартиб додани ҳисобот мутобиқ ба талаботи Меъёрҳои байналмилалии тартиби ҳисоботи молиявӣ, роҳ додани саҳмияҳо ба тиҷорати биржавӣ имконнопазир аст»,- зикр карданд дар Агентӣ.
Нақшаи таъсиси биржаи фондии нави қобили амалиёт хеле пештар мавҷуд буд, аммо ин азм пас аз он қавитар гардид, ки ҶСК «Нерӯгоҳи барқи обии Роғун» ташкил карда шуда, фурӯши озоди саҳмияҳои ин ҷамъият ба аҳолии Тоҷикистон аз соли 2010-ум ба роҳ монда шуд.
Дар маҷмӯъ дар давраи аз 6-уми январи соли 2010 (оғози маъракаи фурӯши саҳмияҳо) аз 5 миллион адад саҳмияи интишоршуда каме бештар аз 1,8 миллион саҳмия фурӯхта шуда, бақияи он ҳудуди 3 миллион коғази қиматнокро ташкил дод, ки имрӯзҳо дар бонкҳои ҷумҳуриявӣ нигоҳ дошта мешаванд.
Саҳмияҳои «Нерӯгоҳи барқи обии Роғун»-ро бо арзиши 100, 500, 1000 ва 5000 сомонӣ харидорӣ кардан мумкин буд. Сертификатҳо бо арзиши бештар аз 5 ҳазор сомонӣ номӣ маҳсуб шуда, боқимонда саҳмияҳои нишондиҳанда ба шумор мераванд.
