Дар мулоқоти ахир бо раиҷумҳур чанде аз рӯҳониён изҳор доштанд, ки Ислом ниёз ба ҳизб надорад ва дар сурати фаъолияти ҲНИТ бояд вожаи Ислом аз он бардошта шавад.
Хабарнигори “Азия-Плюс” назари муовини раиси ҲНИТ Муҳаммадалии Ҳайитро оид ба ин дархости рӯҳониён мушаххас кард:
“Аслан даъвои имомхатибони ҷумҳурӣ дар робита ба ин мавзӯъ хеле ҳам кори носавоб аст. Ва ба мо гуфтаҳои эшон ҳатман рабт надорад. ҲНИТ ҳизби сиёсии сабтиномшуда дар Вазорати адлияи Ҷумҳурии Тоҷикистон мебошад ва мувофиқи моддаи 28-и Сарқонуни кишвар ҳаққи фаъолиятро дорад. Ҳар он чизе, ки имомхатибон пешниҳод кардаанд ва касе ки посух ба онҳо додааст, фикр мекунам, хилофи Сарқонун ва қонун “Дар бораи ҳизбҳои сиёсӣ” рафтор кардааст.
Мо ин гуна масъалагузориҳоро қабул надорем. Мо иттиҳодияи динӣ нестем. Мо як ҳизби сиёсии расман сабтиномшуда дар ҷумҳурӣ мебошем. Ва номи исломӣ дар ҲНИТ соли аввалу моҳи аввал нест. Муддати 40 сол аст, ки ин ҳизб бар асоси ақидаи мазҳаби ҳанафӣ ва дини мубини Ислом фаъолият карда ва иншоаллоҳ дар оянда ҳам фаъолият хоҳад кард.
Ин дастурист ва доираҳои махсусе аз ҳукумат ин масъаларо борҳо матраҳ карданд. Агар дар ёд дошта бошед, соли 2010 мактуби махфии раиси Кумитаи дин Абдураҳим Холиқов ба унвонии президенти кишвар буд, ки дар он ҷо ҳам дар ин мавзӯъ сӯҳбат мерафт ва бояд кӯшиш ба харҷ медоданд, ки ба хусус номи Исломро аз ин ҳизб ҳазф кунанд. Ва ҳамчунон мухолифатҳое ба фаъолияти мо доштанд.
Ба ёд биёрем, ки бар асоси протоколи 32-20 ҳам бо мо хеле мубориза карданд ва фикр мекунам, муваффақ ҳам нашуданд. Дар пайи ин фишорҳо агар чанд нафар аз ҳизб рафта бошанд, боз ҳазорҳо нафари дигар ба ҳизб пайвастанд. Фикр накунам, ки ба осонӣ дар мавриди беномбурдани номи Ислом муваффақ шуда бошанд ин рӯҳониёне, ки дар ҷаласаи назди раисҷумҳур ин масъаларо бардоштанд”.
