Бо фарорасии моҳи шарифи Рамазон раиси вилояти Суғд бо мақсади аз наздик ошно гардидан бо нархҳо ба маҳсулоти ғизойӣ дар ин давра аз бозори бузургтарини минтақаи шимоли ҷумҳурӣ – «Панҷшанбе» боздид кард.
Тавре аз хадамоти матбуоти раиси вилоят иттилоъ доданд, Қоҳир Расулзода бо фаъолияти нуқтаҳои фурӯши бозор аз наздик шинос шуда, аз тоҷирон даъват ба амал овард, ки нархи маҳсулотро боло набаранд.
Тибқи мушоҳидаҳо, имрӯзҳо нархи баъзе маҳсулот поин рафтааст, аз ҷумла нархи гӯшт ба андозаи 10% ва биринҷ – 15%.
Зимни суҳбат бо раиси вилоят тоҷирони бозор изҳор намуданд, ки ба туфайли дар моҳи Рамазон аз ҷониби маъмурияти бозор кам шудани пардохти ҳақмузди иҷора, поин бурдани нархи маҳсулот муяссар шудааст.
Намояндагони маъмурияти бозор изҳор карданд, ки дар моҳи шарифи Рамазон тамоми кишоварзону фермерони хоҳишманди шаҳру навоҳии вилоятро ба таври ройгон бо нуқтаи фурӯш дар бозор таъмин мекунанд.
«Бобати беҳбуди вазъи санитарии бозор, шароити кори фурӯшандагон ва ҳамчунин асфалтпӯшонии роҳҳои дохилии бозор раиси вилоят ба маъмурияти бозори бузургтарини минтақа супоришҳои мушаххас дод», – афзуданд дар хадамоти матбуоти раиси вилоят.
