Давлат Усмон яке аз раҳбарони собиқ Мухолифони муттахидаи тоҷик, собиқ ноиби сарвазир, вазири пешини иқтисоди ҷумҳурӣ, яке аз муассисони бахши тоҷикии Ҳизби наҳзати исломии ИҶШС рӯзи ҷумъа дар нишасти навбатии Бунёди «Муколамаи тамаддунҳо» иброз дошт, ки Тоҷикистон дар замони мавҷудияти Иттиҳоди Шӯравӣ аз лиҳози иқтисодӣ, иҷтимоӣ ва фарҳангӣ ҳалқаи заифе дар миёни ҷамоҳири Осиёи Марказӣ маҳсуб мешуд ва ҳамин ҷиҳатро ба инобат гирифта бисёр қарорҳои барои Тоҷикистон тақдирсоз дар Маскав ва Тошканд қабул мешуданд.
Ҳатто раисони ноҳияҳо, шаҳрҳо, вилоятҳо ва худи Тоҷикистонро Маскав бидуни пазириши Тошканд таъин намекард. Имрӯза раҳбарияти Узбекистон бошад, баъд аз 21 соли истиқлолият бо хотироти гузашта вуҷуд дорад ва мустақилияти Тоҷикистонро ҷиддан қабул намекунад.
«Чунин муносибати беилтифотонаи раҳбарони узбек ба зудӣ мегузарад, фақат вақт лозим аст», -қайд кард Усмон.
Дар идома ӯ таъкид кард, ки барои аланга гирифтани оташи ҷанги шаҳрвандӣ дар Тоҷикистон, дар радифи омилҳои дохилӣ ҳамчунин мудохилаи Маскав ва Тошканд низ мусоидат кардааст.
«Ман фикр дорам, ки Тошканд аз Маскав дида бештар ба барангезиши ҷанги шаҳрвандӣ дар Тоҷикистон мусоидат кардааст, зеро аввоили соли 1992 Маскав то дараҷае заиф буд, ки ҳар иқдоми пешгирифтаи Узбекистон дар минтақа аз ҷониби Русия эътироф мешуд»,- таъкид дошт Усмон.
Ба ақидаи сиёсатмадори тоҷик, ба он, ки Узбекистон дар созмондиҳии ҷанги бародаркуш дар Тоҷикистон саҳм гузоштааст, набояд раҳбарияти кишвари ҳамсояро гунаҳкор кард, зеро онҳо аз рӯйи мулоҳизоти ҳимояи амнияти миллии кишвар, бо мақсади фурӯнишони ҳаракатҳо ва қувваҳои демократии пайдошаванда дар Узбекистон амал карданд.
