Агентии стандартизатсия, метрология, сертификатсия ва нозироти савдои назди ҳукумати ҶТ дар ҳамдастӣ бо Вазорати нақлиёт манъ намудани воридоти воситаҳои нақлиёти боркаши бузургвазнро пешниҳод намуданд, ки ба роҳҳои мошингарди Тоҷикистон мутобиқ нестанд.
Муовини аввали директори Агентии мазкур Ибодулло Қурбонов дар ин робита изҳор кард, ки роҳҳои автомобилгарди Тоҷикистон ба автомашинаҳои боркаши вазнашон аз 40 тонна зиёд (бо бор ё бидуни он) пешбинӣ нашудаанд, вале чанде аз автомашинаҳои боркаше, ки ба Тоҷикистион ворид карда шудаанд, баъзан бо бори вазнаш беш аз 70 тонна равуо мекунанд.
Ба қавли вай, автомашинаҳои боркаши вазни умумиашон беш аз 40 тонна ва борбардории меҳвариашон 10 тонна воситаҳои нақлиёти бузургвазн шуморида мешаванд. «Чунин автомашинаҳо аллакай ворид гардида, баргардонидани онҳо мувофиқи мақсад нест, аз ин рӯ, «Тоҷикстандарт» дар ҳамдастӣ бо мутахассисони Донишгоҳи техникӣ ва Вазорати нақлиёт ба хулосае расиданд, ки дар ин самт асноди меъёрӣ омода созанд, то ки онҳо бо бори камвазнтар ҳаракат кунанд», – иброз дошт номбурда.
Дар ҳамин ҳол, сардори Раёсати назорати давлатии риояи талаботи меъёр ва сифати маҳсулот Нарзулло Шарифов қайд кард, ки дар фасли гармо автомашинаҳои боркаши бузургвазн бояд танҳо шабона ҳаракат кунанд, зеро ба андешаи ӯ, вақте ҳарорат ба 45 дараҷа гармӣ мерасад, сарфи назар аз сифат, роҳ осебпазир буда метавонад.
